Ginpangabay sang alkalde sa ciudad sang Bacolod ang Department of Public Works and Highways (DPWH) nga magkoordinar sa ciudad kun may yara sang proyekto nga iga-implementar
Ini kasunod sang reklamo sang mga residente nga malutak nga alagyan sa Purok Inday Oya, Barangay Vista Alegre, Bacolod City matapos nga ang dalan didto ang ginkay-o.
Suno kay Bacolod City Mayor Greg Gasataya sang nabaton sini ang mensahe angot sa reklamo ginpakadtuan sini gilayon sa City Engineer’s Office ang nasambit nga lugar kag didto nakumpirmar nga may yara sang ginapatuman nga proyekto ang DPWH.
Suno sa alkalde dapat nga may yara sang koordinasyon sa ciudad ilabi na nga may yara sang mga residente nga nagakaapektuhan.
Suno diri, kun may yara sang koordinasyon mameetingan kun ano ang himuon agud nga indi mag-traffic ka malikawan ang pagluntad sang akisidente.
Samtang, aminado ang residente kag enkargo sang pribado nga duta sa Purok Inday Oya, Barangay Vista Alegre, nga sang gin-umpisahan ang pagkay-o sa dalan nangin mabug-at ang dalagan sang trapiko.
Sa interview sang Bombo Radyo Bacolod kay Joseph Retiban, siya mismo ang nakasaksi nga nagbug-at ang dalagan sang trapiko bangud nagasinugat-anay ang mga motorista.
Suno kay Retiban may mga motorista nga wala na nagapati sa mga nagaderiher sang trapiko bangud luyag gid makauna.
Nasaksihan man sini nga sa una nga adlaw sang pagpang-ukab sang contractor sa dalan, may yara sang tatlo ka motorsiklo ang nadisgrasya kag maayo na lamang nga wala sang dako nga samad nga naagom ang driver.
Ginpahayag man nga nangin maayo na sa karun ang dalagan sang trapiko bangud ginbuksan ang bypass road sa ginabantayan sini nga duta.
Aminado man ini nga nagreklamo nakaligad nga adlaw ang mga residente bangod sa malutak nga dalan matapos nag-ulan, ilabi na nga wala pa ma-grader ang dalan.
Dugang pa sini nga apisar makahatag sang kabudlayan ang pagkay-o, mas mabudlay kun indi makay-o ang dalan nga nagakinahanglan nagid sang renovation.
Ginpakamaayo man sini nga sang paglisensya niya sa iya amo, nagsugot ini gilayon nga butangan sang bypass road.
Sa karun ang ginareklamo nga malutak nga dalan ang nakay-o na matapos nga ini ang ginpa-grader na kag bisan mag-ulan ini naman madanlog.
