Opisyal na nga ginkilala sang World Bank (WB) ang Pilipinas bilang upper-middle-income country (UMIC) matapos sini malab-ot ang gintalana nga gross national income (GNI) per capita para sa nasambit nga kategorya.
Base sa pinakaulihi nga assessment sang World Bank subong nga Hulyo, ang GNI per capita sang Pilipinas ang naglab-ot sa $4,850, nga nagsobra sa $4,636 nga threshold nga gintalana para sa mga pungsod nga yara sa upper-middle-income category.
Suno sa Department of Economy, Planning, and Development (DEPDev), ini ang resulta sang tayuyon nga pag-uswag sang ekonomiya, maayo nga pagdumala sang macroeconomy, kag pagpatuman sang gobyerno sang mga reporma.
Nagalaum naman ang ahensya nga mapabaskog sini ang credit profile sang Pilipinas, madugangan ang kumpiyansa kag pagsalig sang mga investors, kag makahatag sang mas madamo nga trabaho para sa mga Pilipino.
Apisar mahimo mabuhinan ang access sa mga concessional loans bangud sa pagsaka sang lebel sang kita sa pungsod, suno kay Department of Economy, Planning, and Development Sec. Arsenio Balisacan, mas dako gihapon ang mangin benepisyo sini sa ekonomiya partikular na sa mas masangkad nga oportunidad sa world market.
Ginkilala man sang tiglikom ang dako nga kontribusyon sang mga Overseas Filipino Workers (OFWs) sa paglab-ot sang amo nga milestone.
Sa pihak sini, nagapabilin ang katuyuan sang gobyerno nga masiguro nga mabatyagan sang tanan nga Pilipino ang resulta sang padayon nga pag-uswag sang ekonomiya.
