Ginaalegar ginapanag-iyahan ni Negros Occidental 3rd District Board Member Andrew Montelibano ang propiedad nga ginagamit sa e-sabong operation sa Hda. Pilar, Brgy. Alicante, EB Magalona nga natukiban sang mga pulis kahapon, July 8.
Sa press conference nga ginpatigayon subong nga aga, ginpahayag ni Police Regional Office – Negros Island Region Director Police Brigadier Gen. Romano Cardiño, yara man kahapon sa compound si Montelibano apang wala nila ini gin-aresto bangud indi siya ang subject sang raid.
Ang otoridad ang magaserbe kuntani sang warrant of arrest sa most wanted person nga nagatrabaho sa lugar.
Apang ginkakibot nila sang makita ang e-sabong facility, nga suno kay Cardiño, mahimo nga masobra isa ka tuig na nga naga-operate santo sa mga equipments kag sa ila nga social media platform nga malapad na ang reach.
Nakita man sa pasilidad ang 124 ka buhi nga inugbulang nga manok, kag 106 ka mga patay na nga manok.
Apat ka persona ang gin-aresto samtang ipaidalom man nila sa forensic examination ang computer nga narecover sa area.
Paathag ni Cardiño nga tumuron pa kun may ihibalo si Montelibano sa illegal nga operasyon, bangod siya ang nakita sa lain nga bahin sang propedad kag indi sa sulod sang pasilidad para sa e-sabong operation.
Dugang pa sini nga ginaseguro pa kun si Montelibano gid man ang tag-iya sang propedad, kag ang mga pamatuod hinali nga ini ang ginarentahan sang iban.
Samtang aminado man ang hepe sang EB Magalona Municipal Police Station nga wala ini sang ihibalo nga may kaangay nga illegal nga aktibidad sa lugar.
Ini bangod pribado ang propedad, yara sa isolated area nga wala sang high way, kag malayo man sa mga pamalay.
Gani indi man mahibaluan sang mga pumuluyo ang illegal nga operasyon luwas na lamang kun sila ang pahanugutan nga makasulod.
Pasalig naman ni Cardiño nga kasuhan ang matumod nga imbulbado bisan pa ini ang public official ukon uniformed personnel.
Si Montelibano amo ang chairperson sa Games and Amusement Board sang Provincial Council.
