Patay ang gina-alegar kawatan matapos ginlabo sang bantay sa manokan sa Prk Lampirong, Brgy 2, Bacolod City pasado alas-11:30 kagab-i.
Ang biktima ang nakilala lamang sa alyas nga Meg, kag wala pa matumod ang full name, samtang wala paman sang pamilya nga nakapalapit agud ini ang kilalahon.
Ang suspect ang ginkilala naman nga si Alyas Romano, 24 anyos, tumandok sang Sitio Sook, Brgy Mabato, Ayungon, Negros Oriental kag duha ka semana pa lamang nga nagabantay sa manokan sang iya nga tiya.
Sa interview sang Bombo Radyo Bacolod kay Police Lt Lyzel Guiniez, pag-abot sang kapulisan sa crime scene, gilayon man nga nagsungka ang suspect.
Pahayag ni Romano nga halos adlaw-adlaw na nga nagakadulaan sang manok kag pato ang iya nga tiya, kag linibo na ang balor sang kinawat.
Tubtob nga kagab-i, nakita niya nga nagakamang kag nagatiid si Alyas Meg bitbit ang binangon.
Gani gin-unahan na sini labo ang gina-alegar kawatan tubtob nga napatay.
Si Alyas Meg ang nakasuksok sang blue tshirt, gray nga short, kag medium built ang panglawason.
