18 ka balay ang nahalitan sang nagluntad nga whirlwind ukon ipo-ipo sa banwa sang Hinigaran, Negros Occidental alas-6:45 kahapon sang aga.
Ang whirlwind ang mas mahinay kun ipaanggid sa tornado ukon buhawi.
Sa interview sang Bombo Radyo Bacolod kay Allan Nangan, officer in charge sang Hinigaran Disaster Risk Reduction and Management Office, ang mga apektado nga lugar ang ginlakipan sang Punta Pasil, Brgy Tagda; Punta Tanulo, Brgy Pilar; kag Sitio Raming, Brgy Pilar, Hinigaran.
Walo ka balay ang partially damaged sa Punta Pasil, tatlo sa Punta Tanulo, kag pito sa Sitio Raming.
Suno diri, kalabanan sa mga kahalitan amo ang nagkalaluk-ab ukon napalid nga mga atop.
Iban sa mga ini ang may atop nga nipa, samtang may-ara man sang mga daan na nga sin.
Pahayag ni Nangan nga madasig lamang ang pagtuhaw sang ipo-ipo, nga nagdungan sa pugada sang ulan.
Iban sa mga biktima ang gilayon man nga ginkay-o ang mga nagkalaguba nga atup, apang ang iban ang ginhatagan na lamang sang Hinigaran Municipal Government sang panibag-o.
