Subong nga Biyernes, mas naghuyang na gid ang Bagyong Inday samtang ini ang nagahulag northwestward sa nasidlangan sang Batanes.
Ang mata sang bagyo ang ulihi nasiplatan sa 620 km nasidlangan Basco, Batanes nga may kabaskugon sang hangin nga 150 km/h malapit sa sentro, kag may pagmadlos nga 185 km/h.
Ini ang nagahulag sa West Northwestward sa 20 km/h samtang nagapabilin ini sa Philippine Sea, kag mahimo maagyan ang Extreme Northern Luzon sini nga gab-i ukon Sabado sang aga, Hulyo 11.
Ini naman ang magapadulong sa nabagatnan sang Japan.
Ang bagyo ang magabiya sa PAR bwas (Sabado), kag maga-landfall sa mainland China sa Dominggo.
Padayon naman nga nagaapekto ang Southwest monsoon ukon habagat sa Palawan, Visayas, kag Mindanao.
Ginpaidalom na sa Tropical Cyclone Wind signal no. 2 sa pila ka mga lugar sa Luzon partikular sa Batanes, Eastern portion sang Babuyan Islands, kag northeastern portion sang mainland Cagayan.
Samtang, nakapaidalom naman sa Signal no. 1 ang nabilin nga bahin sang Babuyan Islands, nabilin nga bahin sang mainland Cagayan, Isabela, Apayao, northern portion sang Abra, Kalinga, eastern portion sang Mountain Province, eastern portion sang Ifugao kag Ilocos Norte.
Lauman ang mabulubagyuhon nga panahon sa Batanes tuga sang Tropical Cyclone Inday.
Samtang, maeksperyensyahan naman ang pag-ulan kag pagmadlos sang hangin sa Cordillera Administrative Region, Ilocos Norte, Cagayan, kag Isabela tuga gihapon sang Tropical Cyclone Inday.
Lauman ang tumalagsahon nga pag-ulan sa MIMAROPA, Western Visayas, Negros Island Region, Zambales, Bataan, Cavite, kag Batangas dala naman sang habagat, samtang sa Bicol Region, nabilin nga bahin sang Ilocos Region, nabilin nga bahin sang Cagayan Valley, nabilin nga bahin sang Central Luzon, kag Quezon, maeksperyensyahan naman ang lapta-lapta nga pag-ulan dala sang tropical cyclone Inday.
Maeksperyensyahan man ang lapta-lapta nga pag-ulan sa Metro Manila, Zamboanga Peninsula, BARMM, SOCCSKSARGEN, nabilin nga bahin sang Luzon, kag nabilin nga bahin sang Visayas dala naman sang habagat.
Samtang, sa nabilin nga bahin sang Mindanao, lauman ang pugtak-pugtak nga pag-ulan dala gihapon sang habagat.
