Ginpahayag sang Punong Barangay sang Barangay 11, Victorias City nga ang duha ka mga biktima sa shooting incident sa Victorias City ang nagabantay sa manokan kag farm apang magkatuhay ang tag-iya.
Sa interview sang Bombo Radyo Bacolod kay Punong Barangay Mary Pugna, sang natabo ang shooting incident yara lamang ini sa ila balay kag ginpahibalo lamang ini sang Chief Tanod nga may yara sang napatay.
Suno kay Pugna, ginpakadtuan niya ini sa Barangay Tanod kag Barangay Kagawad kag nag-apas lang ini.
Ginpahayag sang asawa ni Alex Cunanan, isa sa mga biktima nga ginpalapitan sang nagapakilala nga katapo sang Philippine Army ang iya bana apang may tabon ang nawong.
Naabot ni Cunanan nga indi suldado ang nakaestorya sini rason nga nagdalagan kag ini ang gintiro.
Nakaangkon sang madamo nga pilas sa likod ang biktima nga nagresulta sa kamatayon sini.
Kilala man ni Pugna si Jerome Seballos bangud nagabantay ini sang farm nga ginapanag-iyahan ni Abang Lingkod Party list Representative Frederick “Manman” Ko samtang si Cunanan naman ang nagabantay sa manokan nga ginapanag-iyahan ni Ditching.
Ang Barangay ang magabulig sa pamilya sang nalisdan sa kutob sang ila masarangan.
Panugyan sini sa pumuluyo nga magpangabuhi sang patas kag wala sang ginatapakan nga tawo.
