Nagdangat na sa kapin 15 ka indibidwal ang nautas ang kabuhi matapos ang separado nga landslide sa Sarangani kag Lanao del Sur kahapon, Biyernes sang kaagahon, suno sa mga lokal nga otoridad.
Napulo naman ka tawo ang ginbawian sang kabuhi sa Malapatan, Sarangani, matapos matabunan sang duta ang mga pamalay sa Barangay Poblacion, santo sa Municipal Disaster Risk Reduction and Management Office (MDRRMO).
Base sa report, naggikan sa duha ka pamilya ang mga napatay kalakip ang mga kabataan.
Suno kay Malapatan Mayor Salway Sumbo Jr., ginpatigayon ang rescue operation pasado alas-6:00 sang aga matapos ginreport sang mga opisyal sang purok ang insidente.
Ginpahayag naman sang alkalde nga indi tuman ka dalom ang natiphag nga duta apang wala na natabangan ang iban.
Gina-imbestigaran pa sang mga otoridad ang gintunaan sang landslide kag isa man sa ginalantaw amo ang epekto sang magnitude 7.8 nga linog sang Hunyo 8 nga mahimo nagpahina sang duta.
Samtang, lima naman ang napatay sa Barangay Ngingir sa Calanogas, Lanao del Sur, samtang anum pa ang ginapangita.
Sa karon, padayon ang search and rescue operations para sa anum pa ka ginapatihan natabunan sang duta.
Apang, nabudlayan naman ang mga otoridad nga malab-ot ang apektado nga lugar bangud indi na maagyan sang mga salakyan ang pila ka bahin sang kalsada.
