Nagsaka na sa 57,316 ka mga pamilya ukon 248,000 ka mga indibidwal sa 161 ka mga barangay sa bug-os nga pungsod ang apektado sang paglaslas sang bagyong Inday nga nagpabaskog sang habagat.
Sa karon, nagapabilin sa sulod sang evacuation center ang masobra 6,400 ka tawo ukon 1,900 ka mga pamilya.
Ginbuksan naman sang gobyerno ang masobra 40 ka evacuation center para temporaryo nga matiniran sang mga biktima sang pagbaha kag pag-ulan.
Lauman nga magsaka pa gid ang numero sa nasambit nga datos samtang nagapadayon ang assessment kag validation sang Department of Social Welfare and Development (DSWD) kag sang National Disaster Risk Reduction and Management Council (NDRRMC) sa mga apektado nga lugar kag mga residente.
Kalakip sa mga apektado nga rehiyon amo ang Cagayan Valley, Cordillera, Ilocos Region, Central Luzon, Western Visayas, Negros Island, Zamboanga Peninsula, Northern Mindanao, Davao, SOCCSKSARGEN, kag BARMM.
