Isa sa ginalantaw nga motibo sa pagpatay sa 64 anyos nga lalaki sang lima ka armado nga lalaki sa Sitio Maabo, Barangay San Isidro, E.B. Magalona, Negros Occidental amo ang gina-alegar pagpamerwisyo sang iya nga mga baka sa mga pananom sa lugar.
Sa interview sang Bombo Radyo Bacolod kay Police Captain Jyan Carlo Mania, hepe sang EB Magalona Municipal Police Station, ginatumod pa nila kun ang pagpatay kay alyas “Gerry” ang may kaangtanan sa damlag lang nga pagpatay kanday Jerome Seballos kag Alex Cunanan sa Brgy Gawahon, Victorias City, bangod magkalapit lamang ang lugar.
Ginahibalo man kun konektado ang bag-o nga biktima sa duha ka nauna nga biktima, nga gin-ako sang New People’s Army nga sila ang nagpatay bangod sa gina-alegar spy kag asset sang militar.
Apang wala pa sila sang impormasyon nga may kaangtanan ang mga NPA sa panibag-o nga krimen.
Suno kay Mania, asawa lamang sang biktima ang kaupod sini sa balay sang sila ang ginsulod sang lima ka armado nga lalaki.
Gindala sa gwa ang iya bana, kag didto na sini nabatian ang lupok sang armas-luthang.
Suno sa asawa, nabatian sini nga naghambal ang isa sa mga suspect nga madamo na sang perwisyo ang mga kasapatan sang iya bana sa palibot.
Pahayag sini nga madamo sang hinuptan nga baka ang iya bana, kag ini ang ginapabay-an lamang nga nagalayaw gani kun kaisa ginaharab sang mga ini bisan ang mga pananom sang iban kaangay sang mga mais.
Ginsulod man sang mga armado ang balay sang biktima agud magpangita sang armas, apang sila ang wala man sang nakita.
Suno kay Mania, luwas sa asawa, ginpatawag man nila ang mga medyo malayo nga kaingod sang biktima, mga himata, kasubong man ang ila Punong Barangay.
Pahayag sang hepe nga sa inisyal nga imbestigasyon, wala man sila sang nakita nga record sang kaso ukon reklamo batok sa senior citizen nga biktima.
