Ginkanselar ang klase sa University of Negros Occidental – Recolletos kasunod sang nakita nga bala sa Senior High School building sang buluthuan.
Sa interview sang Bombo Radyo Bacolod kay Police Captain Peter John Ramos, station commander sang Bacolod Police Station 6, under-control na nila ang sitwasyon.
Pahayag sini nga sila ang nakabatun sang tawag gikan sa school management tuhoy sa gina-alegar ginbilin nga bala alas-12:10 kaina sang udto.
Sa pagresponder, ginturn over sang head security sang buluthuan ang ginapatihan bala sang cal. 45, apang ini ang subject pa sa kumpirmasyon sang crime laboratory.
Ginalantaw ni Ramos nga ini ang pagpamahog lamang, bangod sa away-grupo.
Kasunod sang bala, may-ara man sang ginpadala nga written note nga nagapahayag nga maghalong bangod sa pamatyon sini ang mga ‘bully’.
Suno kay Ramos, sarang na nga makabalik ang klase bwas, samtang padayun naman ang ila nga imbestigasyon.
