Korte na ang may diber nga magdesisyon angot sa complaint sang amay sang nahit-and-run sa Lacson Street, Brgy Mandalagan, Bacolod City bangod sa indi makagwa sa ospital ang iya nga bata tuga sang masobra P2.17 million nga hospital fee.
Madumduman nga nagdangop sa Ipa-Bombo Ta segment sang Bombo Radyo Bacolod si Diomedes Genovia Sr. agud magpanawagan kay Renato Locsin, ang tag-iya sang volkswagen sedan nga nakabunggo sa motorsiklo sang iya bata nga si Diomedes Genovia Jr.
Ang iya bata nga 28 anyos ang nabungguan kag ginpalagyuhan sang Marso 27, tubtob nga natumod nga salakyan ni Locsin ang nakabunggo.
Naghatag man sang P30,000 cash si Locsin, samtang masobra isa ka bulan naman sa intensive care unit (ICU) ang pasyente, nga tubtob sa karun indi pa makagwa bangod wala sang inugbayad sa balanse sa hospital bill kag professional fee nga nagdangat na sa P2,175,061.92.
Sa interview sang Bombo Radyo Bacolod kay Police Major Elmer Bonilla, head sang Traffic Enforcement Unit sang Bacolod City Police Office, indi na maka-intra ang kapulisan sa kaso bangod nakapasaka na sang legal complaint ang amay sang biktima.
Apang sa pagreview sini sa kaso, wala sang napatigayon nga settlement gani ang P30,000 nga ginhatag ni Locsin ang makabig lamang nga bulig.
Suno diri, naga-ayo si Locsin nga masaylo sa iban nga ospital nga libre ukon mas barato ang pasyente bangod mahal ang sukot sa riverside medical center, apang wala nagsugot ang pamilya sang biktima.
Suno kay Bonilla, bangod napasaka na ang kaso, sa korte na lamang idangop ang mga complaint bangod ang korte man ang magadeterminar sa kaso kag monetary obligations sang nakabunggo.
