Mahimo pagpasaka sang permit fee sa pagpatigayon sang mga fun run activities, apang pahayag ni Bacolod City Mayor Greg Gasataya nga dapat patas kag reasonable sa parehas nga organizer kag City Government.
Ini bangod sa karun, P100 lamang ang permit fee para sa aktibidad ano man ka damo sang participants, ano man ka layo sang dalaganan, ukon bisan ano ka dako sang event.
Aminado si Mayor Greg nga indi nagid resonable ang P100 bangod ang ciudad ang nagapadala man sang manpower kaangay sang traffic enforcers para magseguro nga indi apektado ang dalagan sang trapiko, kapulisan para sa seguridad, kag ang Bacolod Environment and Natural Resources Office (BENRO) nga nagapabilin sa katinlo antes kag pagkatapos sang event.
Sa pihak sang P100 nga permit fee, ang mga organizers ang nagasukot man sang participation fee para sa nagapartisipar, apang sa masami personal nga pagkabutang man ang gamit sang mga nagapasakop.
Sa pihak sang plano nga pagpasaka sang permit fee, indi naman kumpormi si Mayor Greg sa proposal sang Bacolod Transportation and Traffic Management Department (BTTMD).
Sa proposal sang departamento, ang P10,000 ang minimum permit fee tubtob P20,000 sa 10km race; P50,000 naman sa masobra 10km tubtob 21km race; P75,000 sa masobra 21km tubtob 42km race; kag P10,000 sa mas malayo sa 42km.
Suno kay Mayor Greg nga ginarekomendar sa maayo nga physical health ang fun run, kag indi sini luyag nga ma-untat ang kaangay nga mga aktibidad bangod indi na masarangan sang organizers ang permit fee.
Pahayag sang alkalde nga ang proposal ang talakayon sang Sangguniang Panlungsod, kag nagalaom ini sang fair nga permit fee, nga acceptable sa parehas nga organizers kag City Government.
Maayo man nga tun-an kun pila ang sukot sa iban nga banwa kag ciudad, ukon ang balayran ang ibase sa kadakuon sang aktibidad, kalayuon sang dalaganan, kag kadamuon sang partisipante.
