Patay ang isa ka 64-anyos nga lalaki matapos ginlampusan sang bato sa ulo sa Sitio Binanigan, Barangay Ilaya, Calatrava, Negros Occidental sang Hulyo 21, 2026.
Ginkilala ang biktima nga si Alyas Rodel, 64 anyos, kasado kag residente sang Sitio Binanigan.
Ang suspetsado naman amo si alyas Mike, 22 anyos, soltero, isa ka SK Kagawad kag residente man sang amo nga lugar.
Sa imbestigasyon, ang suspek kag ang biktima kaupod ang ila mga kasilingan ang nag-inum sang makahulubog nga ilimnon kag pagkatapos masulod na kuntani ang suspek sa ila balay apang ginbalabagan ini sang biktima.
Wala man ginsapak sang suspek ang biktima.
Ginhaboy sang biktima sang bato ang balay sang suspek rason nga nagwa ang suspek kun sa diin nagluntad ang komosyon nga nagresulta sa paglampos sang bato.
Nakaagom ang biktima sang patal nga pilas sa ulo rason sang kamatayon sini.
Nagresponde ang mga kapulisan kag gindala pa ang biktima sa Calatrava Municipal Hospital agud mahibaluan ang rason sang kamatayon sini.
Nakahunong na sa Calatrava Municipal Police Station ang suspek matapos nga nagsungka sa kapulisan.
Ginapreparar na sa karun ang mga dokyumento agud nga mapasakaan sang nagakaigo nga kaso ang suspetsado.
