Nagapati si Negros Occidental Provincial Consultant on Energy and Environmental Concerns former Governor Rafael “Lito” Coscolluela nga mas maayo ang manual spraying sang chemical pesticide bilang urgent measure batok sa red-striped soft scale insect (RSSI), sangsa aerial spraying.
Ginklaro man sini nga siya ang nagapamangkot lamang kun ano ang mga tikang nga ginhimo agud maseguro nga indi maapektuhan ang mga ginakuhaan sang gina-inom nga tubig, iban nga pananom, ukon iban nga kasapatan kun magpatigayon sang aerial spraying.
Panindugan sini nga madamo sang usik sa aerial spraying, kag nakadepende pa sa huyop sang hangin kun sa diin magatupa ang chemical pesticide.
Mas pabor pa ang anay gobernador kun magagamit na lamang sang drones para sa spraying, bangod sa mas manubo lamang ang lupad sini.
Apang pahanumdom man sini nga ginpahayag sang eksperto nga halos 50 porsyento gid ang deperensya sang epekto sang aerial spraying kun ipaanggid sa manual spraying.
Suno diri, sa ila nga briefing session, gintudlo sang mga technicians kun paano ang nagakaigo nga spraying nga magagikan sa lawas sang tubo pasaka.
Aminado si Coscolluela nga ini ang mas mahinay, apang mas epektibo ilabi na nga ang babaw sang dahon lamang ang maigo paagi sa aerial spraying, samtang kadam-an sa RSSI ang nagapanago sa idalom sang dahon.
Dugang pa sini nga dapat ma-estoryahan man kun ano nga chemical pesticide ang mas epektibo bangod nagalibog ang ulo sang mga planters kun ano ang ila nga gamiton.
Panugyan sini nga magpatigayon sang field trial nga magatest kun diin sa mga available nga chemical pesticide ang mas epektibo batok sa RSSI.
Nagakahangawa naman ini sa nabatun nga report nga ang 2nd generation sang RSSI ang nakita nga nakaangkon na sang immunity sa una nga gingamit nga pesticide.
