Pasado na sa 1st reading sa Bacolod City Council ang ordinansa nga magahatag sang libre nga school bags, school supplies ukon PE uniform sa tanan nga public high schools sa Bacolod City, lakip na sa mga Bacolodnon nga estudyante sang Negros Occidental High School (NOHS).
Sa interview sang Bombo Radyo Bacolod kay Bacolod City Councilor Atty Caesar Distrito, author sang nasambit nga ordinansa, ginklaro sini nga ang may-ara lamang sa karun nga ordinansa amo ang tuigan nga paghatag sang libre nga school supplies sa Kindergarten kag Elementary pupils.
Sini nga tuig, nalakip sa nahatagan ang mga high school students, kag pagahatagan pa ang mga estudyante sa NOHS.
Suno kay Distrito, mas maayo nga may-ara gid sang ordinansa agud bisan maglain pa ang alkalde sang ciudad, ang programa ang magapadayun gihapon.
Ginklaro man sini sa ginfile nga ordinansa nga ang paghatag sang libre nga school supplies ang wala nakabasi sa administrative control sang Department of Education.
Madumduman nga wala nalakip sa napondohan gikan sa Special Education Fund ang NOHS bangod ini ang ginapadalagan sang probinsya sang Negros Occidental.
Apang nahibaluan man nga mayorya sa mga estudyante sang buluthuan ang mga Bacolodnon.
Suno kay Distrito, tinutuyo sang ordinansa nga mapamag-an ang financial burden sang mga ginikanan sa pag-eskwela sang ila mga kabataan.
Dugang pa niya nga indi sini luyag nga may mabatian nga may mga kabataan nga mag-untat sa pag-eskwela bangod sang wala sang magamit sa pagtuon.
Ang budget ang mahimo maggikan sa Special Education Fund, apang kun indi magsugot DepEd nga matandog ang budget para sa nasambit nga programa, sarang man nga makakuha sang pondo gikan sa General Fund sang ciudad.
Apang paathag man sini nga ang ihatag nga school supplies ang nakadepende sa available nga pondo.
