Ginpahayag sang Executive Vice President sang Bayan Muna nga ang ikalima nga State of the Nation Address (SONA 2026) ni President Ferdinand “Bongbong” Marcos Jr. ang sugpon lamang sa iya SONA 2025 nga ‘MAHIYA NAMAN KAYO.’
Apang ang subong nga tuig, ginatawag naman nila nga ‘NAHIHIYA NAMAN AKO.’
Sa interview sang Bombo Radyo Bacolod kay Atty Carlos Isagani Zarate, halin pa sa Duterte Administration ang isyu tuhoy sa selective justice ukon paglagas lamang sang kontra sang administrasyon, apang ini ang ginpadayun ni Marcos.
Kun sa diin makita nga ginaproteksyunan ang mga yara sa Malacañang nga ma-involved sa mga isyu.
Isa sa makabig sini pamatuod amo ang masobra 1,500 nga mga mamalidha kag mga opisyal sang executive department, kag madamo sa mga ini ang involved sa flood control corruptions, apang ilisipon lamang ang napriso.
Nagapati si Zarate nga ang mga pahayag ni Marcos tuhoy sa nagahilapit nga pagpasaka sang kaso sa iya pakaisa nga si former House Speaker Martin Romualdez ang wala nagakahulugan nga ini ang mapriso na.
Ini bangod may pagalabyan pa nga preliminary investigation nga mahimo magbasura sang kaso.
Gani ginalantaw nila nga pampalubag-loob lamang ni Marcos sa mga tawo ang pagpahanugot sa pagfile sang kaso.
Kun may-ara gid man sang kaso, ini ang mahimo gamay lamang kag sarang lamang makapyansa, kag indi kaangay sang plunder nga non-bailable.
Panindugan ni Zarate nga wala nagakahulugan nga namensyonar sa SONA, may-ara na sang hustisya batok sa mga kurakot sa gobyerno.
Panawagan sang Bayan Muna nga mabaskugon ang ebidensya sa kaso kag indi nga kaangay sang performance lamang.
Pahanumdom sini nga maragtas na sa Pilipinas halin pa sa administrasyon ni Ferdinand Marcos Sr. nga mga magagmay lamang ang nagakapriso.
Halimbawa sini ang pamilya Marcos nga gina-alegar nagkawat sang P20 billion dollars sa gobyerno, apang yara lamang sa P10 billion dollars ang nabalik, samtang wala gid sang bisan isa nga Marcos nga napriso.
Panindugan ni Zarate nga Marcos man ukon Duterte, dapat mapapanabat ang mga nagtraidor sa Pilipinas.
