Nag-file sang ethics complaint ang isa ka grupo sang women’s rights advocates, academics, kag feminists batok kay Senator-Judge Pia Cayetano bangud sa gina-alegar pag-share sang isa ka spliced ukon edited nga video samtang nagaserbe bilang senator-judge sa impeachment trial ni Vice President Sara Duterte.
Ginhingyo sang mga complainant kay Ethics Committee Chair Sen. Vicente “Tito” Sotto III, Chairperson sang Senate Committee on Ethics and Privileges nga imbestigahan si Cayetano angot sa nasambit nga social media post.
Suno sa grupo, naghatag sang sala nga impresyon ang ginpakigbahin nga video nga gin-ako ni House prosecutor kag Akbayan Rep. Chel Diokno nga ginaduso ang impeachment case batok kay Duterte apisar wala sang ebidensya.
Ginpahayag sang coalition nga bilang senator-judge, ginalauman nga magpabilin nga patas kag wala sang may gina-apinan si Cayetano, kag dapat maglikaw sa anuman nga tikang nga mahimo magtuga sang pagduda sa iya impartiality sa impeachment proceedings.
Nagapati man ang mga tagreklamo nga ang pagpalapta sang sala nga impormasyon ang mahimo makaguba sa integridad sang impeachment trial kag sa pagsalig sang publiko sa Senado bilang impeachment court.
Nauna na nga ginklaro ni Diokno ang konteksto sang pahayag.
Ginpaathag ni Diokno nga indi basta-basta lamang ang pag-akusar sang prosekusyon bangud may ara sila sang nakita nga probable cause base sa mga record sang Anti-Money Laundering Council (AMLC) angot sa bilyon-bilyon ka piso sa mga account nanday VP Sara kag sang iya bana.
