Napilitan ang isa ka manugpangasag sa Talisay City nga mag-extra sa pagpanalom sang pakinhason bangod tuman na ka barato sang presyo sang kasag kasunod sang pagban sang Estados Unidos sa pag-export sang blue crab gikan sa Pilipinas.
Sa interview sang Bombo Radyo Bacolod kay Alex Dequiña, 50 anyos, siya ang 25 ka tuig na nga manugkasag, kag ang kasag ang nagabuhi sang ila pamilya.
Sila ang may apat ka kabataan, kun sa diin ang duha ang may pamilya na, ang ikatatlo ang 3rd year Electronic Engineering student sa Technical University of the Philippines, samtang ang agot ang Grade 7.
Antes ang pagban sang blue crab, ang presyo sa puno ang yara pa sa P200 kada kilo sang gamay nga kasag, apang sang ginsuguran ang banning, nagpanaog na sa P110 ang kada kilo.
Suno kay Dequiña, sadto kun makakuha ini sang apat ka kilo sang kasag sa kada adlaw, may mapauli na ini nga P800.
May tion nga mas mataas pa ang kuha, apang may mga inadlaw man nga maiwat ilabi na kun malain ang tiyempo.
Bangod sa magamay nalang nga kita sa pagpangasag, siya sa karun ang ginabuligan sang iya ikatatlo nga bata kun wala sang klase, samtang ini ang nagapanalom man sang pakinhason nga iya ginalibod sa ila nga lugar.
Pahayag sini nga mas mahapos sadto sang wala pa ginban sa US ang blue crab bangod sa kada dungka, segurado na nga may kadtuan ang ila kuha.// Suno diri, indi man sila makapalayo gid sang pagpangasag bangod sa pagmahal sa presyo sang gatong sa ila motorbanca.
Bangod indi makapalayo, gagmay lamang nga kasag ang ila makuha, apang kun dalagko naman ang ila makuha, ini ang mabaligya sa P250 kada kilo.
