Nagalaom ang Punong Barangay sa Brgy Granada, Bacolod City nga madakpan na ang kawatan sang kuryente nga makapila ka beses na nga namerwisyo sa isa ka High School.
Sa interview sang Bombo Radyo Bacolod kay Punong Barangay Armando Vito, naluoy na ini sa school principal nga makapila na nga nagpadulong sa Barangay bangod sa sulit-sulit nga pagpangawat sang kuryente.
Nakapablotter naman ini sa kapulisan.
Suno kay Vito, nagapalibot naman ini sang Barangay Tanod agud magtsekyar sang buluthuan, apang kaangay nga ginalipot lamang sang kawatan ang mga tanod kag pulis.
Para sa Punong Barangay, kaangay nga kabisado na sang kawatan ang buluthuan, apang indi man ini makahambal nga may-ara sang inside job.
May ara man sang Job Order employee nga ginapagwardiya sa eskwelahan, apang sa masami nagakatabo ang pagpangawat kun gab-i ukon sa mga adlaw nga wala sang klase.
Pahayag ni Vito nga perwisyo na katama sa buluthuan ang ginahimo nga pagpangawat sang kuryente, bangod maga-antos man sila sa pagklase kun wala sang electric fan.
Sa ulihi, gin-islan na sang principal ang mga electric wires sang sahi nga indi pagbaklon sang junkshop.
Ang pagpangawat ang masami nagakatabo sa bahin sang bag-o nga building sang buluthuan, kun sa diin madulom ang area.
Nagalaom si Vito nga madakpan na ang kawatan kag mahatagan sang leksyon.
