Naghimo na ang Department of Energy (DOE) sang isa ka joint task force agud iduso ang plano sang administrasyon nga kakason ang system loss charges kag value-added tax (VAT) sa mga balayran sa kuryente sang mga consumer.
Suno sa DOE, ang task-force ang ginabug-usan sang Energy Regulatory Commission (ERC), National Electrification Administration (NEA), kag mga electric cooperative.
Katuyuan sini nga matun-an kag ihanda ang mga regulasyon kag mga proposal nga kinahanglan agud mapatuman ang direktiba ni President Ferdinand Marcos Jr.
Madumduman nga sa iya State of the Nation Address (SONA), ginpangabay sang presidente sa Kongreso nga amyendahan ang Electric Power Industry Reform Act (EPIRA) agud kakason na ang system loss charges kag ang kaupod sini nga VAT sa mga electricity bill.
Suno sa DOE, ginaduso sang ini nga reporma nga mapapanaug ang balayran sa kuryente, maproteksyunan ang mga consumer, kag ma-improbar ang serbisyo sa sektor sang enerhiya.
Sa Hulyo 28, nagpakighinun-anon na ang DOE sa Energy Regulatory Commission kag Manila Electric Company (Meralco) agud talakayon ang mga tikang kag matuman ang proposal.
Apisar, nagpahayag ang Meralco nga handa sila sa pagpakig-koordinar kag tun-an ang mga operational adjustments, ginpahayag ni Meralco Chairman kag CEO Manuel V. Pangilinan nga kinahanglan maistoryahan man kun sin-o ang magalukdo sang system loss charges kun kakason na ini, bangud mahimo maglab-ot sa bilyon-bilyon ka piso ang balor sini.
