Ginkumpirmar sang Office of the Ombudsman nga nagpatigayon sila sang preliminary investigation batok kanday Senator Loren Legarda kag Batangas 1st District Representative Leandro Leviste angot sa reklamo nga P10 billion nga plunder kag graft.
Suno kay Ombudsman Jesus Crispin Remulla, gina-imbestigaran na ang ginaalegar kapaslawan sang renewable energy firm ni Leviste nga mag-provide sang solar power nga yara sa idalom sang congressional franchise.
Suno diri, ginaalegar nakakuha ang kompaniya sang exclusive solar power contracts, apang wala man nahatag ang ginpasalig nga suplay sang kuryente, nga gintawag niya nga “ghost electricity.”
Ginpahayag man ni Remulla nga nangin posible nga nakuha ni Leviste ang franchise sang 2019 sa suporta sang iya iloy nga si Legarda nga chairperson pa sang finance committee sadto.
Nauna na nga nag-file sang reklamo ang Department of Energy (DOE) sa Department of Justice (DOJ) batok kay Leviste kag sa lima ka opisyal sang Solar Para sa Bayan Corporation (SPBC) bangud sa ginaalegar paglapas sa Public Service Act.
Samtang, hugot man nga ginpanginwala ni Legarda ang mga alegasyon.
Suno sa iya, wala sang basehan ang mga akusasyon kag wala sang public funds nga involved sa kaso.
Dugang pa sini, wala pa sila sang may nabaton nga opisyal nga abiso naggikan sa Office of the Ombudsman, apang handa sila nga ibuyagyag ang kamatuoran kag limpyuhon ang ila pangalan.
