Patay ang driver sang motorsiklo matapos makabunggo sa nakapark nga dump truck sa Prk Star Apple, Brgy Vista Alegre, Bacolod City alas-3:15 kaina sang kaagahon.
Ginkilala ang biktima nga si Alan Laraya, 24-anyos, lalaki, single kag residente sang Prk. Guanzon, Brgy. Mansilingan, Bacolod City nga nagamaneho sang Yamaha Nmax nga motorsiklo nga may plate number nga F702TG.
Samtang ang driver sang nakapark nga Isuzu Dump Truck ang ginkilala nga si alyas Agustin, 43 anyos, kasado, kag residente sa Brgy 8, Victorias City.
Sa inisyal nga imbestigasyon sang Traffic Enforcement Unit sang Bacolod City Police Office, ang dump truck ang nagabyahe gikan sa sur padulong sa norte nga dereksyon sang ini ang nagdulog kag nagpark sa kilid sang Economic Highway.
Nakapaandar man ini sang parklight antes nagpanaog bangod may tsekyaron sa salakyan, apang hinali na lamang sini nabatian ang pagsigabong.
Ini matapos magbunggo sa buli sang dumptruck ang motorsiklo.
Bangod sa impact kag pagkalampos sang driver sa sementado nga dalan, ini ang ginbawian sang kabuhi.
Sa karun yara na sa kustodiya sang Bacolod Police Station 7 ang driver sang dump truck.
