Ginpahayag naman sang regional director sang Land Transportation Franchising and Regulatory Board-Negros Island Region (LTFRB-NIR) nga indi man makaintra ang ahensya sa internal nga pagpalakat sang mga operator bangud ang problema nga ginapangatubang sang Bacolod Modernized Jeepney Transport Association, Inc. amo ang utang sa bangko nga wala mabayaran.
Sa interview sang Bombo Radyo Bacolod kay LTFRB-NIR Atty. Gerry Llena, ang solusyon sa ginapangatubang nga problema sang modernized jeepney operators sa karun amo ang pangitaan sang paagi agud nga mabayaran ang utang sa bangko.
Suno kay Llena, nagakumporme ini nga maapektuhan ang mga routa kun wala sang magabiyahe apang mandato sang ahensya nga mapangitaan sang magabiyahe, kag mandato man nila nga dagdagan sang penalidad ang mga nagalapas sa franchise.
