Nagpanawagan sang bulig sa gobyerno ang Bacolod Modernized Jeepney Transport Association, Inc. matapos makabatun sang foreclosure order kag demand letter gikan sa bangko ang pila nila ka mga miyembro nga modern jeepney operators sa Bacolod City kag Negros Occidental.
Sa interview sang Bombo Radyo Bacolod kay Marcelo Ochia, spokesperson sang Bacolod Modernized Jeepney Transport Association Inc. nagalala ang krisis sa pinansyal kag operasyon sang mga nagtuman sa Public Utility Vehicles Modernization Program (PUVMP) bangud sa indi maagwanta nga pagsaka sang presyo sang produktong petrolyo, mataas nga loan amortization kag padayon nga pagbiyahe sang mga colorum ukon wala mga nagakaigo nga dokyumento nga Public Utility Vehicles.
Suno kay Ochia, opisyal nga nagpasa sang sulat ang grupo sa Department of Land Transportation Franchising and Regulatory Board (LTFRB) agud nga hingyuon nga pag-convene sang sang urgent coordination conference kaupod ang mga ahensya sang gobyerno, bangko, kag operators; pag-direct ukon facilitate sang loan restructuring, moratorium sa amortization, refinancing, kag interest reduction; pag-INTENSIFY sang enforcement batok sa mga un-authorized, colorum, kag non-compliant nga mga units; pag-coordinate sa mga LGUs kag pag-review sang mga implementing policies sang PUVMP; kag pag-constitute sang joint DOTr-LTFRB technical working group para sa madasig nga solusyon.
Suno sa grupo, kun ang ila nga ginapangatubang nga problema ang indi dayon mahimuan sang tikang agud nga masolusyunan, madamo sang drivers kag operators kasubong man mga konduktor ang mawad-an sang trabaho.
Dugang pa, dako man nga huol para sa mga commuters sa Bacolod City kag Negros Occidental bangud kulang na ang masakyan nga PUV.
Madumduman nga na-receive ang amo nga sulat sang LTFRB sang Hulyo 29, 2026, apang asta subong, matapos ang masobra isa ka semana, wala pa gid sila nakabaton sang sabat ukon reaksyon gikan sa amo nga ahensya.
