Nagapamatok ang Vice Chairperson sang College Editors Guild of the Philippines–Negros Island Region (CEGP-NIR) sa plano nga ipostpone ang Barangay kag Sangguniang Kabataan (SK) Elections (BSKE).
Sa interview sang Bombo Radyo kay Ketch Tim Infante, ginpahayag sini nga dapat dayunon ang BSKE sa subong nga tuig agud hatagan sang kahigayunan ang mga kabataan nga makapili sang bag-o nga mga lider.
Suno diri, indi husto nga rason ang pagdeklarar sang state of national energy emergency sa pungsod agud i-suspend ang eleksyon, bangod makita nga daw wala ginhatagan sang importansya kag wala ginapamatian ang bahin sang mga kabataan.
Dugang pa niya, madamo nga mga kabataan subong nga tuig ang handa na nga magpamuno, magrepresentar sang ila kaugalingon kag sang ila henerasyon sa gobyerno, kag magpakita nga may yara sila sang ikasarang sa pagdumala.
Para sa iya, ang BSKE ang isa man ka oportunidad para sa pagpasanyog sang young leadership.
Panindugan ni Infante nga ang mga kabtaaan ang may madamo nga mahatag kag mapakita sa gobyerno.
Gani mensahe sini sa mga kabataan nga indi magkahadlok sa pagtindug sa ila mga kinamatarong kasubong man sa pagsulod sa leadership, bangod ini ang isa ka oportunidad para sa pagbag-o nga makabenepisyo man sa ila kag sa masunod nga henerasyon.
