Ginakalipay sang presidente sang Samahan ng Mga Taxi Drivers sa Bacolod nga positibo ang feedback sang mga pasahero sa ila nga grupo sa sulod sang pila na ka tuig.
Sa Agusto 16, igaselebrar sang SMTDB ang ila nga ikatatlo nga founding anniversary.
Sa interview sang Bombo Radyo kay Ronald Allan Salgado, gintukod nila ang grupo sang COVID pandemic matapos nakit-an nga madamo sang driver nga masinulub-on bangud sa epekto sang pandemic.
Napulo lang ka driver ang una nga miyembro sang SMTDB apang makaligad ang tatlo ka tuig, nagdangat na sa 520 ang miyembro sang ila asosasyon ukon masobra katunga sang 1,000 units nga nagabyahe subong sa Bacolod.
Aminado si Salgado nga madamo sang pagtilaw nga ila nasugata sa panugod bangud may mga nagapati nga mahimo scam ukon pangwarta lang ini, apang nalampuwasan nila ini kag ginakilala na sa karon sang mga operator sa ciudad.
Tinutuyo sang asosasyon nga edukaron ang mga driver nga maghatag sang respeto kag mangin tampad sa mga pasahero gani madamo na sang gadgets ukon gamit nga nabilin sang mga pasahero nga nabalik sa tag-iya.
Dako naman ang pasalamat sang mga pasahero nga may kaangay sini nga grupo sa ciudad.
Sa ila nga anibersaryo sa Agusto 16, magapatigayunon ang SMTDB sang caravan sa mga dalanon sa ciudad.
May yara man sang medical mission apang exclusive lang ini sa mga taxi drivers kag sa ila nga pamilya.SAMTANG...Aminado ang presidente sang Samahan ng Mga Taxi Drivers sa Bacolod nga dako ang nadula sa income sang mga taxi drivers bangud sa transportation network vehicle service ukon ride hailing apps.
Sa interview sang Bombo Radyo kay Ronald Allan Salgado, dako nga kompetensya ang TNVS bangud 80 porsyento sang ila nga income ang nadula.
Kun may 10 ka pasahero ang taxi sa bilog nga adlaw nga byahe kag tag-100 ang pamasahe, P1,000 lang ang income sang driver apang buhinan pa ini sang arkila kag gatong.
Bangud sini, P200 nalang ang madala sang driver pauli kag resto pa sa arkila.
Sa tunga-tunga sang pagsaka sang presyo sang gatong, indi pabor ang mga taxi drivers nga ipasaka sa P60 ang flagdown rate kundi ipabilin lang ini sa P50 bangud wala na gid sang may masakay nga pasahero kun magmahal.
Apang nagahingyo sila sa Land Transportation Franchising and Regulatory Board kag sa local government unit nga magpatigayon sang public consultation sa ila kag sa mga TNVS operators agud makontrol ang pagdamo sang TNVS kag indi matam-an sang kapierdihan ang mga taxi driver.
