Apisar nga kaangay nga maathag na nga may misuse sang confidential kag intelligence funds sa Office of the Vice President kag Department of Education sa idalom ni Vice President Sara Duterte, nagapati ang political analyst nga indi ma-under estimate ang mangin posisyon sang defense counsel sa palaabuton.
Sa interview sang Bombo Radyo Bacolod kay Atty Jomax Ortiz, sa dalagan sa karun sa pagtalakay sang Article 1 sang impeachment trial, nagagwa nga may misuse gid sa paggamit sang mga pondo.
Kalakip na diri ang paggamit sang lain-lain nga mga pangalan nga gintawag pa nga ‘fruit salad,’ kag apelyido sang mga Senador.
Dugang pa ni Ortiz nga kwestyonable man kag kaangay nga imposible nga mahimo ang pagbayad sa isa ka tawo sa nagkalainlain nga isla sa sulod lamang sang isa ka adlaw.
Sa pihak sang mahimo paghinugyaw na sang mga anti-Duterte, pahanumdom sang political analyst nga premature pa gihapon ang mahimo padulongan sang trial.
Ini bangod may-ara sang due process, kag magapresentar man sang ila ebidensya ang depensa.
Ang pamangkot lamang kun paano depensahan sang defense counsel ang mga ebidensya sang prosekusyon.
Suno kay Ortiz, ang depensa ang nagpangayo lamang sang 31 ka adlaw sa ila nga pagpresentar, samtang 62 ka trial days naman ang ginpangayo sang prosekusyon.
SAMTANG…Ginklaro sang political analyst nga wala sang problema sa pagfile sang Department of Justice sang 3 counts sang grave threats complaints batok kay Vice President Sara Duterte apisar nga ginatalakay man ang kaangay nga reklamo sa Impeachment Trial.
Sa interview sang Bombo Radyo Bacolod kay Atty Jomax Ortiz, ang ginfile sang DOJ kag ang Article 4 sang Articles of Impeachment ang nakabase sa isa lamang nga video.
Apang apisar nga parehas lang ang issue, wala sang layi nga nagadumili sa pagfile sa local court kun ang akusado ang ginapaidalom na sa impeachment trial sa kaangay man nga issue.
Suno kay Ortiz ang impeachment trial ang isa ka political process, samtang ang ginfile sa korte ang judicial process.
Dugang pa sang abogado nga sa Impeachment trial, wala na ginalantaw ang ebidensya bangod sa ulihi botohay gihapon ang magahukom kun ma-impeach si VP Sara.
Ginalantaw sini nga ang tinutuyo sa impeachment ang indi lamang para mapalos sa pagka-Bise President si VP Sara kundi ang perpetual disqualification to hold public office, agud ini ang indi makapapili sa 2028 Presidential Elections.
Gani sa paglantaw sang political analyst, nga bisan magresign si VP Sara sa pwesto, ipadayun gihapon ang impeachment trial para sa perpetual disqualification.
Sa pihak nga bahin, ang kaso naman nga ginfile sang DOJ ang gamay lamang nga kaso kag ginapanglimog lang bisan sang mga lokal nga opisyales.
Bangod gamay lamang ang kaso, ini ang ginalantaw nga mahulog lamang sa Regional Trial Court.
Ang kaso ang bailable kag tayog na ang P40,000 sa kada counts ukon kabug-usan nga P120,000.
Sa pihak nga bahin, kun sa impeachment trial pwede lamang nga indi magtambong si VP Sara tubtob matapos, ang opisyal ang mapilitan naman nga magtambong sa hearing sa Regional Trial Court.
Nagapati si Ortiz nga may political color sa likod sang pagfile sang DOJ sang kaso, kag ang tinutuyo lamang sini amo ang mahigkuan ang pangalan sang Bise Presidente.
