Ginkondenar sang lead counsel ni Vice President Sara Duterte nga si Atty. Sheila Sison kahapon ang isa ka social media post sang private prosecutor nga si Atty. Armando Ligutan natuhoy sa misleading questions samtang nagapadayon ang impeachment trial.
Ini kasunod sang pagsabtanay nanday private prosecutor Lorna Kapunan kag defense lawyer Kristine Ferrer angot sa paggamit sang misleading questions sa cross-examination.
Suno kay Sison, ginkahangawa sini ang pagpagwa sang statement ni Ligutan samtang ongoing ang court hearing.
Suno kay Sison, ang impeachment court ang may mataas nga standard sa decorum kag ang Rule 18 sang impeachment rules ang nagadumili sa mga partisipante nga magkomento natuhoy sa merito sang kaso.
Sa Facebook post, ginpahayag ni Ligutan nga isa ka prinsipyo nga nahibaluan sang tanan nga mga abogado kag mga law student, nga ang mga misleading questions ukon patalang ang wala ginatugutan bisan pa sa cross-examination.
Para kay Sison, “in bad taste” ang nasambit nga post kag indi nagakaigo nga himuon batok sa kapareho nga myembro sang Bar.
Suno diri, may obligasyon ang magkatuhay nga bahin nga magpakita sang respeto, courtesy, kag humility sa kada isa.
Ginpaathag man ni Sison nga wala ginsabat ni Ferrer ang komento ni Kapunan tuhoy sa misleading questions.
Suno diri, nagsabat lamang si Ferrer sa pahayag ni Kapunan nga indi tanan nga pamangkot ang mahimo masabat sa “yes” or “no.”
Suno kay Sison, ang ginatumod ni Ferrer sa iya sabat amo ang ‘leading questions’ nga ginatugutan sa cross-examination.
Samtang, ginpahayag naman ni Presiding Judge Francis “Chiz” Escudero nga may isa ka kampo nga makapila na ka beses nga nagalapas sa court rules sa ila mga public comments.
Suno diri, nagahanda na siya sang ruling, warning, kag order angot sa isyu.
Ginpahayag naman ni Ligutan sa isa ka interview nga wala ini sang malain nga intensyon sa iya nga social media post kag nagbase lamang ini sa Rules of Court.
