Ginalauman nga makahatag sang rekomendasyon ang Environmental Management Bureau–Negros Island Region (EMB-NIR) para sa gilayon kag husto nga disposal sang mga basura nga gikan sa pag-excavate sa old dumpsite sang ciudad sa Buri Road, Barangay Mandalagan, Bacolod City.
Ini ang ginkasugtan sa technical conference nga ginpangunahan sang City Legal Office kag Bacolod Environment and Natural Resources Office ukon BENRO, upod si Councilor Homer Bais, chairperson sang Sangguniang Panlungsod Committee on Environment, kag mga representante sang EMB-NIR, site developer kag nagkalain-lain nga city department heads sang Miyerkules, Agosto 12.
Kabahin sa gin-istoryahan ang husto nga pamaagi sa pag-transport kag pag-dispose sang basura halin sa old dumpsite padulong sa sanitary landfill sa Barangay Felisa, suno sa direktiba ni Mayor Greg Gasataya.
Suno sa pahayag ni Bacolod City Administrator Atty. Mark Steven Mayo, kinahanglan masolbar ini sa labing madali bangud nagahatag na ini sang peligro kag indi man nami lantawon.
Ginpahayag ni Mayo, nga dapat mag-comply sa existing rules kag guidelines sa paghaboy sang dako nga volume sang basura nga ginkalkal bangud sa nagkalain-lain nga development projects sa old dumpsite.
Ang EMB ang magapatigayon sang isa pa ka technical conferences kaupod ang private developers agud nga masiguro ang hilway nga pag-transport sang basura kasunid sang patigayunon nga waste hazard test sa lugar.
Ang rekomendasyon sang EMB-NIR ang iga-endorso sa Solid Waste Management Board para sa approval kag gilayon nga implementasyon sang concerned stakeholders.
