Nagapatigayon subong ang Police Regional Office-Negros Island Region (PRO NIR) sang prevention, early intervention kag rapid response system sa mga eskwelahan sa rehiyon kasunod sa nagluntad nga shooting incident sa Ateneo de Zamboanga University.
Sa interview sang Bombo Radyo kay Police Lieutenant Col. Joem Malong, Public Information Officer sang PRO-NIR, ginpahayag sini nga luwas sa Simulation Exercise (SIMEX) sa mga eskwelahan, nakatutok subong ang PRO NIR sa regular assessment, koordinasyon sa school administrators kag Philippine National Police, prevention, early intervention kag rapid response.
Suno kay Malong, ginmanduan ang police units nga magpatigayon sang threat assessments kag early intervention agud mahibaluan ang mga posible nga weak points sa seguridad sang tagsa ka eskwelahan.
Ginaduso man ang school emergency hotline kag ang pag-promote sang Safe NIR 911 agud mas mangin madasig pa gid ang pagresponde sa mga emerhensya.
Dugang pa, ginpahugtan man ang integrated patrol deployment sa palibot sang mga eskwelahan.
Gin-adjust ang deployment sang mga kapulisan nga mangin mas malapit sa school areas agud makaresponde gilayon kun may emerhensya.
Para naman sa mga pribado nga eskwelahan, ginakilala sang kapulisan nga may yara ini sang kaugalingon nga security protocols, lakip na ang mga polisa sa entry kag access sang mga tawo kag salakyan.
Apang padayon sa gihapon ang koordinasyon sang PNP kag school administrators agud ma-assess ang mga safety measures.
Gina-emphasize sang PRO NIR nga kinahanglan ang kooperasyon sang mga eskwelahan kag mga ginikanan sa pagpatuman sang mga safety measures.
Importante man nga mahibaluan sang mga kabataan ang posible nga mga konsekwensya sang delikado nga mga buluhaton sa sulod sang eskwelahan.
