Nagpahanumdom ang PRO-NIR sa mga kapulisan sa proper handling kag storage sang issued firearms agud masiguro nga wala sang access ang mga kabataan kasunod sa nagluntad nga shooting incident sa Ateneo de Zamboanga University.
Madumduman nga ginkakas sa pwesto ang Customs police Chief sa Zamboanga nga amay sang Grade 9 student nga si Mohammad Mael Jalani nga suspect sa pagpangluthang sa nasambit nga buluthuan.
Sa interview sang Bombo Radyo kay Pol. Lt. Col Joem Malong, Public Information Officer sang PRO-NIR, ginpahayag sini nga dapat mangin responsible ang mga personnel sa paghupot sang ila mga armas bangud indi gid mamonitor 24/7 sang mga ginikanan ang ila mga kabataan.
Suno diri, dapat ipaintindi man sang ginikanan sa bata kun ano ang gun safety kag kun ano ka importante ang kabuhi sang isa ka tawo.
Ini bangud indi tanan nahibaluan sang mga ginikanan kun ano ang nagakatabo sa sulod sang ila eskwelahan.
Dugang pa, lakip man sa dapat hatagan sang atensyon amo ang paggamit sang internet kag social media, kun sa diin mahimo makita ukon makakuha ang bata sang mga impormasyon may kaangtanan sa armas kag iban pa nga delikado nga aktibidad.
Sa pihak nga bahin, ginpahayag ni Malong nga dapat may intervention sa eskwelahan kun may mga kaso sang bullying ukon iban nga problema nga nagakatabo kag dapat gilayon nga ipahibalo sa mga ginikanan.
Mensahe sini nga ang paglikaw sa amo nga mga insidente ang indi lamang responsibilidad sang kapulisan sa baylo dapat magbinuligay ang kapulisan, eskwelahan kasubong man ang mga ginikanan sa pagprotekta sa mga kabataan.
