May bag-o na nga Provincial Director ang Negros Oriental Police Provincial Office (NOrPPO).
Sa kumpirmasyon ni Police Regional Office – Negros Island Region (PRO-NIR) Director Police Brig. Gen. Romano Cardiño, nagpanaog na sang order ang Camp Crame nga nagadesignar kay Police Col. Jonathan Abella bilang bag-o nga NOrPPO Director.
Si Abella amo ang PNP Directorate for Police Community Relations (DPCR) sa Camp Crame.
Suno kay Cardiño, sang Agosto 31 pa ang effectivity sang mandato apang nakanselar ang schedule sa pagbyahe ni Abella gani subong nga adlaw pa ini maka-abot, samtang ang assumption of office ang mahimo nga patigayunon naman bwas, Setyembre 2.
Madumduman nga na-relieve sa pwesto si anay NOrPPO Director Police Col. Criscent Tiguelo, kasubong man ang anom ka hepem gikan sa Bayawan City Police Station, Guihulngan City Police Station, Sibulan Municipal Police Station, Pamplona Municipal Police Station, Tayasan Municipal Police Station, kag Ayungon Municipal Police Station.
Ini bangod sa One Strike Policy sang PNP batok sa illegal gambling.
Nahibaluan nga kun ma-operate sang higher PNP units kag maaresto ang mga nagapatigayon sang illegal gambling activities sa mga nasakupan sang ila lower units, kag nahibaluan nga kulang ukon wala sang tikang nga nahimo ang mga otoridad batok sa illegal nga mga buluhaton, ang mga police officials ang ginarelieve sa pwesto bilang kabahin sang ila command responsibility.
Nagalaom si Cardiño nga indi na ini maliwat, kag mauntat na ang mga illegal nga panahor sa Negros Island Region.
