Nagpatigayon naman sang separado nga imbestigasyon ang Commission on Human Rights sa natabo nga pagpangluthang sang 14 anyos nga estudyante sa Ateneo de Zamboanga University sang Martes.
Sa interview sang Bombo Radyo Bacolod kay CHR Commissioner Atty Beda Epres, ginatugyan na nila sa kapulisan ang criminal aspect sang insidente.
Madumduman nga duha lamang ang kumpirmado nga napatay, nga ginalakipan sang biktima kag ang 14 anyos nga suspect nga nag-utas sang kabuhi, nga lunsay mga top students.
Ang focus sang imbestigasyon sang CHR amo ang paglantaw sa kun paano naka-access sang armas ang estudyante.
Panawagan nila sa mga mamalidha nga ma-amyendahan ang layi sa pagpanag-iya sang armas-luthang kag malakip sa provision sini ang natuhoy sa gun handling.
Suno kay Epres, dapat nakapagkit sa layi nga may pangatubangon man nga kaso ang gun holder inkaso may iban nga makakuha kag maggamit sang ila armas.
Nahibaluan nga ang duha ka cal.9mm pistol, nga ang isa ang may casing accessories, nga gingamit sang suspect ang ginapanag-iyahan sang iya amay nga Customs police chief sa Zamboanga.
Sa school shooting sa Tacloban sang tinalikdan, gikan man sa tiya nga pulis ang armas-luthang nga gingamit sang isa ka suspect.
Apang pahanumdom ni Epres nga nagapabilin gihapon ang panindugan sang CHR batok sa ginaduso nga pagpanubo sang age of criminal liabilify.
