Gin-aresto sang mga otoridad ang isa ka kilala nga vlogger sa ciudad sang Bacolod kag ang ka-live in sini kasunod sang ginpatigayon nga drug buybust operation nga ginpatigayon sang Philippine Drug Enforcement Agency-Negros Island Region (PDEA-NIR) sa Purok Magtiayon, Barangay 10, Bacolod, kahapon, Agosto 25.
Ginkilala ang nadakpan nga si Julia Peruelo, miyembro sang LGBTQ community kag ang ka-live sini nga si alyas Christian matapos nga makuhaan sang ginaalegar 50 grams sang suspected shabu.
Sa interview sang Bombo Radyo Bacolod kay Lito Peruelo, amay ni Julia, ginpahayag sini nga ang iya anak ang nagaistar sa nasambit nga lugar nga madamo sang mga tawo nga nagabaligya sang malain nga butang apang nagpanindugan ini nga wala nagaintra ang iya bata sa iligal nga buluhaton.
Ini bangud ang iya nga bata ang isa ka charity vlogger kag madamo naman ini sang nabuligan.
Gin-alegar man sang amay nga ginpangbaklas sang mga naka-mask nga operatiba ang CCTV kag internet sa balay sang iya anak sang gin-aresto ang bata kag kalive-in sini.
Magluwas sa ginguba nga CCTV, gin-alegar man sang amay nga ginkuha man ang cellphone sa balay sang iya bata.
Suno kay Lito, indi matuod nga nakuhaan sang illegal nga droga ang iya bata kag wala man ini nagakumporme sa ginapatigayon nga operasyon sang PDEA-NIR bangud nagasuksok ang mga ini sang mask.
Sa kaangot nga balita, ginpahayag naman ni Benjamin ang tiyo ni Julia nga gintago siya sa banyo sang dako nga tawo nga nakasuksok sang face-mask nga operatiba sang Philippine Drug Enforcement Agency-Negros Island Region (PDEA-NIR).
Suno kay Benjamin, naabtan siya sang operatiba nga nagatig-ang kag ginsulod sa banyo kag gin-alegar nga ginhambalan pa nga indi mag-intra ukon magpanugid bangud kun himuon niya ini siya ang tiruhon.
Dugang pa sini nga si Julia, ang ka live-in sini kag ang Barangay Kagawad ang yara sa kwarto sang nag-operate ang katapo sang PDEA-NIR.
Suno kay Benjamin wala sang baklanay nga natabo bangud hinali lang nga nagsulod ang operatiba sa balay ni Julia kag gin-alegar pa nga ang mga ini may dala nga illegal nga druga sang nagsulod sa balay sang vlogger.
Wala man ini nakadepara kun ano kadamuon ang dala sang mga operatiba bangud gintago siya sa banyo kag ang Barangay Kagawad.
Ginpahayag man sini nga wala sang sala kag wala nagaintra sa illegal nga buluhaton ang iya nga hinablos kag nagabulig pa ini sa mga tawo.
