Indi magnubo sa 160 ka mga indibidwal ang kumpirmado nga ginbawian sang kabuhi samtang kapin 400 naman ang padayon nga ginapangita matapos ang tuman ka dako nga flash flood sa naaminhan nga bahin sang Nepal kag border sang Tibet kahapon, Agosto 26.
Santo sa mga opisyal nga report, nag-ugat ang trahedya matapos natiphag ang dako nga bahin sang glacier naggikan sa bukid nga nagdaludo padulong sa patag kag nagresulta sa magnitude 4.4 nga linog sa lugar.
Ang mga natiphag nga duta kag dalagko nga bato ang nagbalabag sa water flow sa Bhote Koshi River malapit sa border sang Tibet gani nagresulta ini sang pag-awas sang tubig kag lutak padulong sa kaingod nga komunidad.
Kalakip sa mga missing ang ginatos ka mga lokal nga residente, mga turista, kag pila ka mga katapo sang security forces.
Nadulaan man sang suplay sang kuryente ang mga kalapit nga distrito matapos mahalitan ang mga mayor nga kalsada, taytay, kag mga hydropower plant.
Padayon ang search and rescue operation sang Nepal Army kaupod ang mga emergency response team gamit ang mga helicopter kag specialized equipment.
Naka-high alert na man ang tanan nga komunidad ilabi na sa malapit sa suba samtang padayon nga ginabantayan sang mga otoridad ang ilig sang tubig gikan sa border.
