Indi magnubo sa 24 ka mga estudyante ang napatay matapos magluntad ang isa ka sunog sa bahin sang Bukavu, sa eastern Congo, kahapon.
Suno kay Lawrence Kanyuka, spokesperson sang M23 rebel group, 19 ka babayi kag lima ka lalaki ang nautas ang kabuhi, samtang pilason ang 29 ka iban pa kag sa karon ginabulong sa ospital.
Nag-umpisa ang kalayo sa isa ka balay antes naglapta sa duha ka eskwelahan, suno sa nakasaksi.
Suno diri, may mga estudyante nga na-trap sa sulod sang Furaha secondary school kag pila sa ila ang na-suffocate.
Samtang, indi naman ma-track sang mga medical personnel ang eksakto nga numero sang mga nasamaran bangud sa kadamuon.
Santo sa source, makitid ang alagyan pagwa gani ang iban nga estudyante ang naglinumpat sa bintana samtang ang iban ang nagtinikludanay pagwa sa pwertahan.
Ang iban sa ila ang nagkalatumba kag nalapak-lapakan.
Sa karon, padayon pa ang imbestigasyon kun ano ang gintunaan sang kalayo.
Nagapangatubang subong sang kabudlayan ang gobyerno sang Congo ilabi na sa pagkontrol sa nasidlangan nga bahin sang pungsod, sa diin ginadumalahan na sang mga rebelde ang ciudad sang Bukavu, samtang nagalala naman ang Ebola outbreak sa rehiyon.
