Mahimo magdangat pa sa pila ka semana ukon binulan agud ma-identify ang mga biktima sa nasunog nga MV June Aster sa diin napatay ang 76 ka mga indibidwal, suno sa mga otoridad.
Padayon sa karon ang pag-imbestiga kag pagkumpara sang mga DNA samples sa mga nasunog nga bangkay.
Pila ka mga bangkay ang nasapwan nga nagatinumpok sa isa ka bahin suno kay forensic specialist Richard Allan Mangalip sang Philippine National Police, samtang ang iban naman ang lapta-lapta sa nagkalain-lain nga bahin sang ferry nga sakay ang masobra 130 ka mga pasahero sang natabo ang insidente.
Ang barko ang padulong sa Coron, Palawan naggikan sa Manila nga may kapin 20 oras nga byahe.
Suno kay Mangalip, kalabanan sa mga bangkay ang nasapwan nga “charred” ukon sunog na ang kondisyon.
Gani indi sila makahatag sang eksakto nga timeline para sa identification bangud sa kadamuon sang specimen nga kinahanglan i-examine.
Ini matapos marekober ang dugang pa nga 41 ka mga bangkay samtang nagapabilin nga missing ang 13 ka iban pa.
Santo sa mga opisyal, lauman nga madamo pa ang marekober bangud wala pa lubos nga nausisa sang mga otoridad ang isa ka bahin sang ferry nga napuno sang tubig.
Madumduman nga nakasulod ang mga rescuers sa barko sang Biyernes matapos mapalong ang kalayo isa ka adlaw ang nakaligad humalin sang nag-umpisa ang sunog.
Padayon pa ang imbestigasyon agud matumod ang gintunaan sang kalayo sa diin ginatinguhaan sang mga otoridad nga ma-access ang lower deck nga ginbaha kasubong man ang engine room.
Santo naman sa mga survivors, may nabatian sila nga duha ka lupok antes natabo ang insidente.
