Ginalantaw ni former chief presidential Legal Counsel Atty Salvador Panelo nga drama lamang ang pagfile sang kaso kay former House Speaker Martin Romualdez.
Sa interview sang Bombo Radyo Bacolod kay Panelo, ginapakita lang sang administrasyon nga seryoso sila sa paglagas kag mapapanabat ang mga imbulbado sa flood control corruptions.
Apang nagapati ini nga mahina ang ifile nga kaso, agud ini ang ma-abswelto.
Pinaagi sini, indi na sila mabasol nga wala sang may ginhimo, bangod mahambal nila nga ginpasakaan nila sang kaso ang ginakonsiderar “big fish” sa kurapsyon.
Suno kay Panelo, masobra isa ka tuig na nga ginatudlo nga si Romualdez ang mastermind sa kurapsyon, antes pa ginfile ang kaso.
Indi ini kumpormi sa rasun nga nadugayan ang pagfile sang kaso bangod gintun-an pa ang pagfile sang kaso.
Apang suno kay Panelo, gintun-an pa sang mga ini kun paano makafile sang mahina nga kaso.
Ginpahanumdom sini ang pahayag ni former Ako Bicol Partylist Representative Zaldy Co nga ‘I’m not going down alone,’ nga patimaan nga isugid sini ang mga kaupdanan niya sa kurapsyon.
Nagapati ini nga malakip diri si President Ferdinand Marcos Jr.
Ini bangod ang Department of Budget and Management amo ang nagapreparar sang budget kag ginalantaw kun ano nga programa ang kinahanglan sang mga ahensya.
Nagapati ini nga may ihibalo ang Presidente sa pagtalana sang budget, samtang apisar nga wala, sa pagbalik sa iya sang National Expenditure Program para sa pagpirma, makita man sini kun may mga budget insertions.
Dugang sini nga may ginhatag nga gahom sa Presidente nga ma-veto ang makita niya nga indi kinahanglan nga budget allocations.
Gani para kay Panelo, nakahibalo na si Marcos nga may irigularidad sa budget apang ini ang hungod nga gintugutan.
