Gin-acquit sang Sandiganbayan Second Division si anay Department of Health (DOH) Secretary kag Iloilo 1st District Rep. Janette Garin sa mga kaso nga graft kag malversation of public funds angot sa kontrobersyal nga pagbakal sang Dengvaxia vaccine sang 2015.
Base sa desisyon sang korte, napamatud-an nga wala sang supisyente nga ebidensya nga nagpakita sang malain nga katuyuan ukon negligence sa bahin ni Garin sa pagpatuman sang nasambit nga immunization program sa pungsod.
Nag-ugat ang kaso sa pagbakal sang gobyerno sang kapin P3.5 billion nga balor sang bakuna sang Disyembre 2015 sa pharmaceutical giant nga Sanofi Pasteur sa ulihi nga bahin sang Aquino administration.
Ginpatigayon ang immunization program sang Abril 2016 sa diin masobra 800,000 ka mga estudyante sa mga pampubliko nga buluthuan sa Central Luzon, Calabarzon, kag National Capital Region ang nahatagan sang doses kontra sa nagasaka nga kaso sang dengue.
Apang, ginpauntat ang programa sang Nobyembre 2017 matapos magpagwa sang paandam ang Sanofi nga ang bakuna ang mahimo magtuga sang mas malala nga sintomas sa mga indibidwal nga wala pa naka-eksperyensya sang dengue.
Ini ang nagresulta sang kontrobersya kag serye sang mga kaso batok sa mga health officials.
Sa pihak sini, ginpanindugan sang kampo ni Garin nga ginpatigayon ang procurement sa husto nga proseso kag santo sa pagsulondan sang gobyerno.
