Siyam ang nasamaran sa pagkasunog sang booth sang Canlaon City sa Buglasan Festival 2026 sa Dumaguete City, Negros Oriental.
Sa report sang Dumaguete Bureau of Fire Protection, nabatun nila ang report alas-9:04 kagab-i, Oktubre 21.
Gilayon man nga nagresponder ang mga fire personnel kag nakaabot sa area alas-9:07, samtang natigayun nga mafireout alas-9:15 sang gab-i.
1st alarm lamang ang deklarasyon sang sunog, kag gina-alegar electrical in nature kag incidental ang rasun sang sunog.
Siyam naman ka persona ang napilasan nga ginalakipan ni Rhean Catigtig, 26 anyos, single, residente sang Sibulan, Negros Oriental, nga nag-agom sang pilas sa agtang, 2nd degree burn sa likod kag duha ka butkon, kag ini ang nalipungan man.
Kasubong man ang lima ka tuig nga bata nga babayi, residente sang Sibulan, nga nag-agom naman sang bagras sa guya, nagsambil ang bibig, kag kabudlayan sa pagginhawa.
31 anyos nga babayi lalaki nga si Ariel Delgado, 31 anyos, kasado, residente sang Cadawinonan, Dumaguete City, nga nagka-injury sa duha ka tiil.
Melanie Delgado, 27 anyos, kasado, residente man sa kaangay nga lugar, nga nag-agom naman sang 2nd degree burns sa likod, mga butkon, kag nawala nga batiis, kag bagras sa natuo nga tuhod kag tiil.
Walo ka tuig nga bata nga babayi, residente man sa kaangat nga lugar, nga nag-angkon sang kabudlayan sa paghulag sang iya mga butkon.
Archel Artus Jr. 28 anyos, single, sang Brgy Taclobo, Dumaguete City, nga ipaidalom sa CT Scan, kag bagras sa nawala kag natuo nga batiis.
Cee John Sibonga, 20 anyos, single, empleyado sang Canlaon City Government kag residente sang Brgy Mabigo, Canlaon City, nga naka-agom sang ankle injury sa natuo nga tiil.
Florna Jean Navarro Florentine, 18 anyos, empleyado sang bakeshop sa Dumaguete City, apang tumandok sang Himamaylan City, Negros Occidental, nga nag-agom sang bagras sa agtang, natuo nga guya, sag-ang, kag sa nawala nga tiil kag natuo nga butkon.
Sheryl Deloria, 25 anyos, single, residente sang Zamboanguita, Negros Oriental, nga nadislocate ang natuo nga tiil.
Ang mga biktima ang gindala sa Negros Oriental Provincial Hospital kag Siliman University Medical Center.
Ginmanduan naman ang Buglasan Security and Safety Committee sang reinspection sang tanan nga booth sa Buglasan Festival.
Ginpinsar sang festival goer sa Buglasan Festival 2026 sa Dumaguete City, Negros Oriental nga kabahin pa sa design sang booth sang Canlaon City ang kalayo.
Ini matapos masunog ang Canlaon Booth kapin alas-9:00 kagab-i.
Sa interview sang Bombo Radyo Bacolod kay Alyas Chelle, sila ang yara sa katupad nga booth sang banwa sang Amlan sang matabo ang sunog.
Nahibaluan nga ang desinyo sang Canlaon booth ang ratan basket ang lawas, samtang sa ibabaw may mga desinyo nga mga utanon kag prutas nga prudokto sang ciudad, kag ang Bulkan Kanlaon sa ibabaw.
Ang Bulkan ang may lighting effects man nga kaangay nga nagabaga ang crater sang bulkan, kag ini ang may effect man nga naga-aso.
Gani ginpinsar sini nga kalakip pa sa effects ang kalayo.
Nakibot na lamang ini sang may naglulumpat na kag nagasininggitan na ang mga pumuluyo.
Madasig naman suno diri nga nakaresponder ang mga bombero apang tuman man ka dasig ang paglapta sang kalayo kun sa diin sa sulod lang sang pila ka segundos, ginlamon na ang bilog nga booth.
