Ginlunsar sang Police Regional Office Negros Island Region kag Department of Education ang labing una nga CampuSaya sa Bacolod City National High School kahapon.
Ang aktibidad ang ginpangunahan ni PRO NIR Director PBGen Rudencido Reales.
Sa interview sang Bombo Radyo kay Reales, tinutuyo sang CampuSaya indi lamang palig-onon ang seguridad sa mga eskwelahan kundi agud matutokan man ang mental health sang mga estudyante kasubong man ang mga ginikanan sa paghibalo sa mga makita nga warning signs sa pamatasan sang ila bata.
Suno kay Reales, gin-una lamang nila ang Grade 9 kag Grade 10 bangud kadam-an sa amo nga grade level, involve sa mga insidente ang mga estudyante.
Samtang, isunod naman nila ang iban nga grade level sa masunod nga semana.
Matapos diri sa Bacolod City, natalana man nga igalunsar ang programa sa Negros Occidental kag sang Negros Oriental sa masunod nga semana.
Ginpahayag ni Reales nga indi lamang kaupod sang PRO NIR ang mga manunudlo kundi kalakip man ang mga psychologist kag guidance counselor agud magbulig sa mga estudyante.
Dugang pa, kabahin man sang kampaya ang paghatag sang mga ihibalo sa mga Brgy Tanod nahanungod sa ila nga papel sa pagbantay sa mga eskwelahan.
Ginalauman sang PRO NIR Director nga paagi sa programa mas mangin responsable ang mga estudyante sa paggamit sang social media kag pagreport gilayon sa mga pagpamahog.
Samtang, ginpasalig naman ni Bacolod City Councilor Israel Salanga nga suportado gid ni Mayor Greg Gasataya ang programa nga CampuSaya para sa kaluwasan sang mga estudyante.
