Ginklaro sang Alkalde sa ciudad sang Bacolod nga indi na magpasilabot ang ciudad kun diin pagagastuhon ang premyo nga nabaton sang eskwelahan kag Barangay sa Street Dance and Arena Competition sa Masskara Festival 2026.
Suno kay Bacolod City Mayor Greg Gasataya, obligasyon lamang sang ciudad nga maghatag sang premyo sa mga nagdaog sa kompetisyon kag matapos sini, nakadepende na sa winning brgy kag eskwelahan kun paano nila pagagamiton ang premyo.
Ini kasunod sa social media post sang anonymous person kun sa diin ginapahayag nga P1,500 lamang ang ginhatag sa mga dancers sang Bacolod City National High School.
Apang, ginpaathag naman ni BCNHS School Principal Richard Gelangre nga wala pa nila nabaton ang premyo nga P750,000.
Sa karun, ginapa-usisa ni Mayor Greg ang amo nga report sa Department of Education (DepEd) Bacolod Schools Division.
Madumduman nga nakuha sang Bacolod City National High School ang kampeonato sa Street Dance and Arena Competition School Category kag sila ang nagbaton sang P750, 000 nga premyo.
Samtang, ang Barangay Taculing naman ang nag-champion sa Barangay Category nga nagbaton sang P1 million nga premyo.
