Nagabaton sang pagdayaw ang traffic enforcer sang Bacolod nga si Raymus Tingson bangud sa iya nga katampad sa trabaho.
Sang Oktubre 22, nakuhaan sang video si Tingson nga wala niya ginbaton ang P200 nga ginhatag sang taxi driver nga nag-U Turn sa No U-Turn slot sa atubang sang Upper East sa Circumferential Road, Barangay Villamonte.
Sa interview sang Bombo Radyo kay Tingson nga nagaistar sa Brgy. Villamonte, iya ginpahayag nga nag-U Turn ang driver sa unhan sang No U-Turn slot gani ginpaparahan niya ini.
Wala niya ini gin-issuehan sang citation ticket bangud sa unhan sang signage ini nagliso apang ginremind nga indi na pagsuliton ang pag-U Turn sa lugar.
Sang ginbalik na niya ang lisensya sang driver, gindaho sa iya sang driver ang P200 nga halin kuno sa pasahero.
Sa pagbaylo nga magpatentar, ginbalik ni Tingson ang amo nga kantidad.
Suno kay Tingson, wala siya sang ideya nga ginvideohan siya sang amo nga tinion kag ginpahibalo nalang ini sang iya kaupod.
Natabo ini sa adlaw nga kaadlawan sang iya amay nga nagtaliwan na.
Suno sa iya, may yara gid sang mga driver nga may violation nga nagahatag sang bribe nga P500 ukon P1,000 ilabi na ang indi taga-Bacolod apang wala niya ini ginabaton bangud indi siya makasaho sa pahapos nga buluhaton.
Suno sa iya, wala siya nagapatentar sa kwarta bangud gusto niya nga nagapangabudlay antes makakwarta.
Suno kay Tingson, indi na maisip ang mga driver nga nagatanyag sang bribe apang bangud nahadlok ini sa Ginuo, wala gid niya ginabaton.
Ginapaminsar man niya pirme ang reminder sang iya amay nga nagtaliwan nga indi magkuha sang iya sang iban bisan pigado.
Sang Pebrero subong nga tuig, ginhatagan man sang pagkilala si Tingson bangud sa pagbalik sang nakita niya nga wallet nga nagaunod sang dako nga kantidad nga kwarta.
