Wala nagakumporme ang abugado sa ciudad sang Bacolod sa panindugan sang mga abugado ni Senator Ronald “Bato” Dela Rosa nga indi ini mahimo dakpon bangud nga wala sang warrant of arrest nga gin-issue batok sa iya ang korte sang Pilipinas.
Sa interview sang Bombo Radyo Bacolod kay Atty. Renecito Novero, ang Supreme Court ang nakapahayag na nga ang International Criminal Court ang may jurisdiction sa kaangay nga kaso ni Senator Dela Rosa.
Suno kay Novero, dapat kilalahon kag respetuhon sang kampo sang senador ang warrant of arrest nga gin-issue sang ICC.
Sa pihak nga bahin ginpahayag man sang abugado nga ang warrant of arrest nga gin-issue sang International Criminal Court ang wala sang expiration.
Indi kaangay sang warrant of arrest nga gin-issue sang korte sang Pilipinas nga naga-issue pa sang alias warrant of arrest sa tion nga ang original warrant of arrest ang indi na maserbe kag ginbalik sang law enforcement ukon ang akusado ang nagapabilin nga at large.
Dugang pa sa paghangop sang abugado, santo sa Rome Statute na-indict naman si Dela Rosa sa kaso nga ginpasaka batok sa iya.
Samtang nakadepende na sa gobyerno sang Pilipinas kun paano sini nga madakop kag masurrender sa ICC ang pugante nga senador.
Nahibaluan nga sang tinalikdan nga adlaw gin-anunsyar ni DILG Secretary Jonvic Remulla ang P50 million nga patong sa ulo ni Dela Rosa para sa kun sin-o man ang makahatag sang impormasyon agud nga madakpan ini.
