Ginpaathag ni Bacolod City Councilor Atty. Caesar Distrito nga sa P4.1 billion nga loan sang ciudad, P2.4 billion pa lamang ang narelease sang Development Bank of the Philippines (DBP).// Sa interview sang Bombo Radyo kay Atty. Distrito, santo sa Partial Joint Committee Report sang Sangguniang Panlungsod (SP), P2.414 billion ukon 57.88 percent lamang sa P4.171 billion ang narelease sang DBP tubtob sang Setyembre 30, 2026.
Ang Partial Joint Committee Report ang ginpatigayon sang Committee on Appropriations and Finance, Committee on Government Assets, kag Committee on Laws, Ordinances and Good Government.
Lakip sa mga proyekto nga gina-usisa sang mga komitiba amo ang road network improvements, asphalt overlay, traffic lights, City Motorpool, solar power generating systems, drainage improvements, City Warehouse, Legislative Building, rehabilitation sang Old City Hall, City Health Complex, kag iban pa nga development projects.
Ang P1.7 billion nga wala napaggwa.
Ginpaathag man sang Konsehal nga indi basta-basta kag madamo sang proseso nga gina-require sang DBP antes irelease ang pondo lakip na diri ang timeframe sang proyekto, accomplishment kag evaluation sang mga engineers.
Dugang pa, ang DBP ang may kaugalingon nga auditor gani sila ang indi makapagutso lamang paggwa sang pondo.
Gani suno diri, kun indi matapos ang isa ka proyekto, indi man mabayaran ang mga kontraktor.
Suno sa Konsehal, indi tanan nga ginapost sa social media ang dapat patihan.
Suno sa iya, nakita sa report nga indi matuod nga naubos gasto ang P4.171 billion sang administrasyon ni former Bacolod City Mayor Alfredo “Albee” Benitez.
Pahayag ni Distrito, wala sang ginatago ang ciudad kag ang report ang gin-ubra agud malikawan ang mga statement nga indi transparent ang ciudad.
Ginpaathag man ni Distrito nga ini ang partial report pa lamang sa loan sang ciudad sa termino ni Benitez kag wala pa nalakip ang kay Leonardia nga P1.8 billion nga loan.
Padayon man suno sa iya, ang pagreview sang mga komitiba sa mga nasambit nga proyekto.
