Ginapanugyan ni former Chief Presidential Legal Counsel Atty Salvador Panelo kanday Vice President Sara Duterte kag mga kaalyado sini nga maggwa kag pangunahan ang pagpatigayon sang adlaw-adlaw nga rally batok sa mga paglapas sa layi sang Marcos Administration.
Sa interview sang Bombo Radyo Bacolod kay Panelo, ginahimo sang administrasyon ang tanan nga pamaagi para maconvict si Vice President Sara Duterte.
Kun sa diin wala-tuo ang mga ginpatigayon nga pagpamahog, pagpapriso, kag pagpasaka sang kaso sa mga kaalyado ni VP Sara, partikular na sa mga Senador.
Bangod indi nila masarangan ang 16 votes treshold para sa conviction sa impeachment trial, ginpapriso, gindemanda, kag ginpahog nila ang pila sa mga Senador nga mahimo magboto pabor sa pag-acquit sa Bise Presidente, kag gingamit nga rasun para mapanaog sa 14 votes ang threshold for conviction.
Sa maathag nga paglapas sang layi sang Administrasyon, nagakatingala si Panelo nga tubtob sa karun wala pa naggwa ang mga pumuluyo sa dalanon para magprotesta.
Ginalantaw sini nga nagahulat lamang ang mga pumuluyo nga may National figure nga magpanguna sa ila, gani dapat na maggwa sa dalan sanday VP Sara, Senator Robin Padilla, kag Senator Bong Go agud pangunahan ang adlaw-adlaw nga rally agud magbugtaw na ang gobyerno.
Ginpaanggid sini sa nakaligad nga mga henerasyon kun sa diin sila ang kalakip sa naggwa agud magpanguna sa mga pagprotesta.
Pahanumdom niya nga gina-uyatan na ni President Ferdinand Marcos Jr. ang tanan nga ahensya sang gobyerno, kag nakahibalo ini kun paano pahulagon para sa iya benepisyo.
Nagapati ini nga indi mag-untat ang Marcos Administration sa pamulitika, gani nagakaigo na para magsinggitan naman ang mga pumuluyo.
