Nakadihon na ang National Capital Region Police Office (NCRPO) sang security plan para sa nagahilapit nga 49th Association of Southeast Asian Nation (ASEAN) Summit nga patigayunon sa Metro Manila.
Ang summit ang magaumpisa sa Nobyembre 13 tubtob 18, 2026 kag magaserbe nga nagapanguna nga venue ang Philippine International Convention Center (PICC) sa Pasay City.
Suno kay NCRPO Spokesperson, Police Lieutenant Colonel Hazel Asilo, masobra sa 12,600 nga personnel sang NCRPO ang i-deploy agud nga magbantay sa mga nagapanguna nga venue.
Magluwas pa ini sa mga i-deploy nga force multipliers nagikan sa nagkalain-lain nga mga grupo kaangay sang mga tiglawas sang Local Government Units.
Suno kay Asilo, iga-deploy ang mga police sa bug-os nga perimeter, venue, kag route security agud masiguro ang seguridad sang tanan nga ASEAN delegates, diplomats kag dignitaries nga magatambong nagikan sa nagkalain-lain nga pungsod.
Magaupod man ang mga police sa mga convoy halin sa pag-abot sang mga delegado sa Pilipinas tubtob sa ila nga pagpauli kun matapos na ang ASEAN Summit.
Magluwas sa seguridad, pagatutukan man sang NCRPO ang medical components sang ASEAN security agud nga preparahan ang anuman nga medical emergency nga posible nga matabo sa tion sang assembly.
Sa karun, pila ka mga serye sang simulation exercises ang ginpatigayon sang PNP, ilabi na sa mga kritikal nga tinion agud nga mapreparahan ang tanan nga mga insidente nga posible nga matabo samtang ginapatigayon ang high-level meeting sang mga dignitary nagikan sa magkatuhay nga Southeast Asian countries.
