Aminado ang labor advocate nga ang malala nga kurapsyon amo ang nagaresulta sa padayun nga pagsarurot sang ekonomiya, indi kaangay sang iban nga mga pungsod nga padayun nga naga-uswag.
Sa interview sang Bombo Radyo Bacolod kay Wennie Sancho, secretary-general sang General Alliance of Workers Association (GAWA), tubtob nga nagapabilin ang kurapsyon, flood control corruptions, ghost projects, budget insertion, unprogrammed funds, kag iban pa nga pamaagi sa pangurakot, wala sang tyansa nga makabangon ang Pilipinas.
Pahayag sini nga kun tipunon ang mga ginkurakot nga kwarta sang gobyerno, ini ang nagadangat na sa trillions of pesos.
Suno diri, ang populasyon sang Pilipinas ang yara lamang sa karun sa masobra 112.7 million, gani imbes nga ginkawat ang pondo sang gobyerno, kuntani ginhatagan nalang sang tig-P1 million ang kada Pilipino.
Paandam niya nga kun magluntad ang inflation bangod sa pagsarurot sang balor sang piso, nga nagdangat na sa record low nga P64.17 per 1 US dollar, malumos nagid ang purchasing power sang mga mamumugon.
Suno diri, ginapahayag sang gobyerno nga ang minimum wage nga P550 sa karun, ang nagakaigo na sa family of 5.
Ini ang wala gina-ugyunan sang labor advocate sa panindugan nga kun ang P550 ang tungaon sa lima ka miyembro sang isa ka pamilya, kag maseparar pa sa tatlo ka kaon sa isa ka adlaw, ini ang tuman gid ka kulang.
Panindugan ni Sancho nga dapat mapasar na ang National Living Wage nga dugang nga P250 sa sweldo.
May-ara na sang hagna tuhoy diri, kag ginpirmahan naman sang pila ka mamalidha, apang gintago na lamang.
Suno diri, ang natalana nga ipasar nga dugang nga P40 tubtob P45 sa daily minimum wage ang indi makarestore sang purchasing power, bangod ang karun nga P550 nga minimum wage ang katumbas na lamang sang P356.
Indi naman aplikable ang hurubaton nga “hugton ang paha” bangod ang sweldo sa karun ang hand-to-mouth na lamang ukon sa pagdaho derekta na bayad sa gin-utangan.
Panawagan ni Sancho nga tapnaon na ang kurapsyon bangod ini ang makatuga pa sa pag-atras sang mga investors sa pag-negosyo sa Pilipinas.
Pangabay niya nga hatagan man sang kabuhi nga may dignidad, kag sweldo nga makabuhi ang mga Pilipino.
