Ginalantaw sang Philippine Rice Research Institute – Negros Occidental nga mahimo makahatag na sila sang binhi sa mga rice farmers sa masunod nga semana.
Sa interview sang Bombo Radyo Bacolod kay PhilRice – Negros Occidental chapter Director Ommal Abdulkadil, sa idalom sang Rice Competitiveness Enhancement Fund (RCEF) program, nakapaani na ang mga mangunguma sa Bago City kag Murcia.
Apang sila ang indi pa makahatag sang binhi bangod ginahulat pa ang resulta sang purity test kag germination sang mga binhi gikan sa Seed Grower Association.
Ang mga binhi ang may heat-tolerant nga property, gani makasarang magbato sa tig-ilinit.
Sila ang may variety nga 400, 500, kag 600 series, kag sakop sa ginahatagan nila sang binhi ang Western Visayas, Central Visayas, kag Negros Island Region.
Bangod sa ginalauman nga pagnubo sang mga rice farmers nga makapadayun sa pagtanom, ang anay 50 hectares nga duta nga gintalana sa seed production, ang ginpanubo nila sa 35 hectares.
Dugang pa nga ang ila area sa Brgy Cansilayan, Murcia ang yara man sa punta sang irrigation system.
Ini ang rekomendasyon man sang National Irrigation Administration (NIA) bangod sa maninit nga tubig, kag apisar may-ara sang solar power irrigation, ini ang makapatubig lamang sa napulo ka ektarya.
Apang aminado man ini nga indi masaligan ang tasok bangod may posibilidad nga magnubo man ang tubig sa water source.
Suno kay Abdulkadil, testingan man nila nga magtanom sang iban nga crops sa mabilin nga 15 hectares, kag tion naman ini para makay-o ukon mahampilan nila ang mga guba nga kahon.
